مريم خر الدين عن طلاقها من محمود ذوالفقار 

كتب / علي عز

-ازاي اتطلقتي من محمود ذو الفقار؟
=دي قصة ، انا كنت ساكنة مع محمود في عمارة في الدور الroof ، وبعدين شفت صاحب العمارة قلتله معندكش شقة فاضية ، قالي فيه شقة نمرة 13 رابع دور .. قلتله ممكن أجرها من حضرتك ، قالي اتفضلي .. دفعت 75 جنيه ايجار و75 تأمين وبقت الشقة بتاعتي ، كان يروح محمود ذو الفقار مكتبه وانا اقعد اعمل ديكور وتجهيزات الشقة من وراه ، خلصت تجهيز الشقة أوضة لبنتي وأوضة ليا ، وبعدين نزلت الهدوم من وراه ، وبعدين الصبح بدري وهو نايم خدت بنتي وخدت المربية بتاعتها وقلت للسفرجي لما البيه يصحى قوله "مدام مريم تحت في رابع دور في شقتها" وجبت ترباس قد الداهية كده وتربست الباب .. على الساعة 10 لقيت محمود قاعد يخبط في الباب ويقول افتحي ، هقتلك ، هموتك ، يلعن ابوكي وبتاع .. لو الكلب يرد عليه كنت انا رديت عليه ، راح الاستوديو وهو راجع اتكسف يطلع من البوابين عشان مريم مراته اللي بيضربها وبيديها على قفاها واخدة شقة وفرشتها وقاعدة فيها وهو لا يدري .. فبعت المساعد بتاعه لم هدومه من الشقة وهو بيقفل الباب الترباس مقفلش فنسي باب الشقة مفتوح .. جه البواب عايز الايجار دفعلته ايجار شقتي ، قالي "والشقة اللي فوق؟" ، قلتله "دي باسم مين؟" .. قالي "باسم محمود ذو الفقار" قلتله "اجري خدهم منه" .. قالي يا مدام الشقة مفتوحة .. المهم بعد كده كان أي عامل عنده فرح ومحتاج جهاز ابعته على شقة محمود ياخد اللي عايزه منها لحد ما فرقت الشقة كلها على العمال ..العمال بقى مع محمود يقعدوا يدعولي واحد منهم قاله "ربنا يخلي مدام مريم دي اديتني حتة اوضة نوم" وصف له الأوضة عرف انها الأوضة اللي كان بينام عليها .. فقام مطلقني وتف على ورقة الطلاق كمان