هل مثل الراحل عبدالوارث عسر دور شاب،

طارق حبيب؛- استاذ عبد الوارث هل صحيح طوال حياتك الفنية مامثلتش ابداً و لا مرة حتى في عز عز شبابك دور شاب؟
عبد الوارث عسر ؛- ابداً، اللي حصل اني اول ما التحقت بفرقة الاستاذ جورج ابيض رحمة الله عليه في اكتوبر سنة ١٩١٧ كان اول دور مثلته هو في رواية الممثل كين اللي هو دور مدير المسرح وبعدين اعطوني دور الراعي العجوز اللي في رواية اوديب "اوديبوس ملكاً " ف الدور دا لخبطني قوي راجل عنده ١٢٠ سنة وشفته من ممثلين قبل مني مثلوه، دا اللي بيفتِش الحكاية لاوديب و بيفهمه ان مراته دي تبقى امه، ف في المشهد الاستاذ جورج ابيض بيتك بشدة على كتف الراجل العجوز " اللي هو انا" فبيوقع في الارض ضعيف ١٢٠ سنة الناس تضحك، كل ما تيجي الحتة دي الناس تضحك انا اقول يا خواتي يا عالم دي قمة الدراما!! يقولولي سيبك الجمهور عايز يضحك و السلام،، انا في دماغي لا الجمهور دا هو المقياس الصحيح و هو الحكم العادل الحقيقي، فقعدت افكر قولت اه بالمكياج الدقن طويلة قوي و الراجل لما بيخش عالمسرح بيرتعش و في ايده عُكازة فالدقن بتتهز بتدي صورة شبه كوميك شوية و لما بيقع الناس بتضحك طب اعمل ايه ما ارتعش اومال ابو ١٢٠ سنة دا بيعمل ايه؟ خدت بعضي و رُحت لدكتور دفعتله الڤيزيتا قاللي اتفضل قُلتله لا اتفضل انت اقعد قُدامي انا جاي اسألك اقولك مظاهر الشيخوخة بيرتعش مافيش شيخوخة ماترتعشي؟ واحد عنده ١٢٠ سنة و لا يرتعش ممكن دا؟ قاللي ممكن قوي قاللي عنده تصلب تبقى حركته بطيئة و لما يشيل رجله علشان ينقلها بيبقى جسمه كله كأنه بيتنقل و يبقى بالشكل دا قُلتله بس سلام عليكم و من هنا غيرت طبيعة الاداء و عملت مكياج صغرت الدقن خليتها لحد صدري بس و عريضة كدا علشان ماتتهزش و دخلت و اديت الدور الناس ما ضحكوش، تأسفوا، فخرجت ليلتها كانت اسعد ليلة في حياتي كلها، الدنيا مش سايعاني